Allir kvinnulandsdystir nú á FS

Enn ein varði er lagaður á FaroeSoccer, nú vit hava lagt allar teir almennu kvinnulandsdystirnar út. Ein SERA góð kensla. Hesir dystirnir hava leingi verið á veg, men nú eru teir so her. Nú er lætt at fáa eitt skjótt yvirlit yvir dystir, kappingar, úrslit, hvør var við, hvør skoraði, hvør hevur spælt mest o.s.fr. júst sum hjá monnunum. Klárt hjá øllum at brúka, ikki minst fjølmiðlunum.

Dystirnir finnast á høvuðsvalmyndini undir LANDSDYSTIR.

Í nøkrum førum hevur verið trupult at finna fram til fakta, tí FSF hevur gjøgnum tíðirnar tíverri ikki gjørt sær nóg stóran ómak at fáa fatur á og goyma dystarfakta (dómaraseðlar), og tá fleiri dystir heldur ikki verða skrásettir hjá UEFA – aloftast ymisk sløg av vinardystum, so hevur mangan verið trupult at finna fakta, serliga hjá konufólkunum. Í summum førum er FS tískil heldur ikki komið 100% á mál, tíverri, men hetta snýr seg oftari um mótstøðuliðini enn um føroysku liðini. FaroeSoccer arbeiðir framvegis við landsdystunum.

Vit fara tí inniliga at heita allir kvinnulandsliðleikarar, venjarar og fólk annars kring landsliðini um at taka eina løtu og ganga ígjøgnum dystirnar og boða frá, um okkurt manglar ella er skeivt skrásett, ALT hevur áhuga.

Tað ber eisini til at viðmerkja beinleiðis her á síðuni undir greinini ella á FS á facebook, takk fyri.

Vit spæla saman!