FaroeSoccer hevur hildið rættuliga “lágan profil” síðani kappingarlok, og sum lesarar ella brúkarar okkara uttan iva hava lagt til merkis, hava vit í løtuni heldur ongan fastan skrivara til síðuna.
Tað er sum heild ivasamt, hvussu verður við skrivingini í ár, tí trupult er at finna dugnalig, støðug og álítandi fólk, sum “matcha” sera trongu fíggjarkarmarnar hjá FaroeSoccer. Avmarkaða tøka tíðin og orkan verður fyrst og fremst brúkt upp á sjálva hagtalsskrásetingina, sum eisini er høvuðsendamálið við FaroeSoccer.
FaroeSoccer bíðar enn eftir at frætta frá FSF, hvussu verður við samstarvi okkara um dómaraseðlarnar – ella um nakað samstarv verður yvirhøvur. FSF arbeiðir sum kunnugt við onkrari aðrari loysn í sambandi við skráseting av dómaraseðlum. Men vit vóna at frætta fyrsta dagin, og tað legði FSF eisini upp til á seinasta aðalfundi tess.
Áðrenn nøkur avgerð er fallin um eitt møguligt samstarv millum FaroeSoccer og FSF er ilt at siga, hvussu skrásetingin hjá FaroeSoccer fer at fara fram í ár, men vit vóna at hava okkurt nýtt um hetta fyrsta dagin.