B68 uppi og Skála tætt við

1. DEILD MENN - 25. UMFAR:

B68 og B71 eru liðug við 1. deild hjá monnum fyri hesaferð.

Tað er í stuttum tað, sum kann staðfestast eftir 25. umfar, sum varð leikt um vikuskiftið.

Og so kann eisini staðfestast, at Skála hevur óvanliga góð kort á hondini, nú tvey umfør eru eftir at leika í næstbestu deildini hjá monnum.

Skála hevur fimm stig fleiri enn FC Suðuroy, og tað eru bara seks stig eftir at spæla um.

So tað ber til hjá felagsliðnum úr syðra parti av Suðuroynni, men tað sær altso munandi svartari út enn tað gjørdi undan vikuskiftinum. Skyldina hava suðuroyingar sjálvir. Ella ið hvussu er hava teir ein stóran part av henni. Tí FC Suðuroy tapti dystin á útivølli móti EB/Streymi leygardagin, og tað sendi B68 upp í Effodeildina áðrenn teir høvdu spælt, og tað gav Skála øll tey bestu kortini á hondina.

Í roynd og veru kann alt hatta spælið enda longu í næst seinasta umfarinum, tá FC Suðuroy skal spæla móti B36. Tapir felagsliðið tann dystin, er Skála uppi, líkamikið, hvussu tað gongur hjá skálamonnum.

Í botninum er árið farið hjá sandoyingum. Teir hava tapt og flyta niður úr 1. deild í ár. At tað hendir er nokk ikki so nógv at siga til, tí liðið hevur ikki havt fólkið, og spurningurin so, hvat sandoyingar ætla at gera við tað næsta ár. Hitt niðurflytingarplássið er ein spurningur millum TB, sum í løtuni er næstafast, og EB/Streym. Hvussu verður við tí, ber ikki til at siga nakað um fyrr enn vit vita, hvat lið – umframt 07 Vestur – flytir niður úr Effodeildini. Verður tað TB, so flytir TB niður úr 1. deild, líkamikið hvar teir liggja.

Annars er ein áhugavert eygleiðing tann stóri munurin, sum er millum næstbestu deildina hjá monnum í ár og í fjør.

Tá 25 umfør vóru leikt, hevði oddaliðið í 1. deild 62 stig, samanborið við tey 50, sum oddaliðið hevur í ár.

Tað sama er galdandi fyri Skála, sum í fjør gjørdist nummar trý við  54 stigum tilsamans. Í løtuni hevur Skála 45 stig, og er nummar tvey, so tað sigur eitt sindur um styrkina í deildini.

Hvussu leikur fer um vikuskiftið er sjálvandi ilt at siga, men spenning fáa vit eftir øllum at døma.

Dystirnir í 26. umfari eru hesir: