Nú er B68 á odda

1. DEILD MENN – 23. UMFAR:

Eftir at hava sveiggja rættiliga fitt, við misjøvnum úrslitum, hevur B68 nú brádliga yvirtikið oddasessin í næstbestu deildini hjá monnum.

Fyri nøkrum fárum vikum síðan, bara eina eftir, at landskappingin varð tikin uppaftur eftir summarsteðgin, var HB 11 stig á odda, og tá mundu tey flestu siga, at kappingin hjá teimum næstbestu liðunum her á landi, var avgjørt.

Men so kom stígur í hjá HB, og við sínum fimta ósigri í landskappingini á rað, er liðið nú ikki longur fremst.

Tann heiðurin eigur B68, sum hóast til tíðir rættiliga misjavnt spæl, hevur klárað at leggja seg framum HB.

Tað er í grundini eitt bragd, sum tó meira kann leggjast HB til last enn toftamonnum til heiðurs, tí tað kemur ikki ofta fyri, at eitt oddalið tapir fimm dystir á rað.

Úrslitini hjá HB hava við sær, at kappingin í næstbestu deildini nú brádliga er víðopin og spennandi aftur. Tí umframt at B68 er vorðið oddalið, hava Skála og FC Suðuroy sína egnu innanhýsis kapping koyrandi sínamillum.

Tað er bara tað eina stigið millum liðini – ella sum nú tvey – og tað avhongur bara av, hvat av liðunum vinnur tað einstaka umfari. Seinasta umfar var tað FC Suðuroy, sum stjól triðjapláss frá Skála, men tað helt ikki meira enn í nakrar dagar, so tapti FC Suðuroy í Klaksvík. Og so fór Skála framumaftur.

Sum tað liggur nú, er Skála hitt liðið, sum flytir upp. Men um tað heldur, ja, tað er torført at siga. Tí enn eru fýra umfør eftir, og alt kann í grundini henda enn.

Í botninum er spurningurin, hvør skal niður við B71. Sandoyingar hava níggju stig upp og bara 12 stig eru eftir at spæla um, og tí er øgiliga ósannlíkt, at teir bjarga sær. TB er næstniðast og EB/Streymur triðniðast, og tað er torført at siga, hvat av liðunum bjargar sær. Og so avhongur tað jú av støðuni í bestu deildini, har TB eisini liggur til niðurflyting í løtuni.

Hvussu tað endar, mugu vit bíða við at siga nakað um, vit kunnu tó siga, at tað eisini er spenningur í 1. deild.

Næsta umfar, sum verður spælt 14. september - eftir landsdystirnar - sær soleiðis út: