Munurin farin í helvt

EFFODEILDIN - 21. UMFAR:

Verður tað HB ella ÍF, sum verður føroyameistari?

Og verður tað TB ella KÍ, sum flyta niður í 1. deild saman við 07 Vestur?

Tað einasta, sum er nøkulunda greitt í Effodeildini er, at antin HB ella ÍF vera føroyameistarar í ár. Og tað er eisini rímiliga greitt, at 07 Vestur flytir niður. Spurningurin er so bara, um tað verður TB, KÍ ella AB, sum flytir niður saman við 07 Vestri.

Hyggja vit at tí, sum er skrivað á hesum síðum fyrr, so slerdu vit í summarsteðginum fast, at hagtølini søgdu, at HB verður meistari, og at 07 Vestur og AB flyta niður.

Nú 21 umfør eru spæld – nøkur lið hava tó spælt 20 umfør – kunnu vit staðfesta, at tá tað snýr seg um 07 Vestur høvdu vit “rætt”. Liðið hevur í dag 11 stig, og hevur tíggju stig upp til KÍ, sum liggur beint hinumegin bjargingina.

Spurningurin er so, um tað er sannlíkt, at 07 Vestur skal klára at bjarga sær ella ikki. Sæð út frá stigatalinum er einki, sum talar fyri tí, tí higartil hevur felagsliðið úr Vágum bara vunnið tveir dystir. Tá hagtølini siga tað, kunnu vit spyrja okkum sjálvi, hví 07 Vestur brádliga skal fara at vinna so nógvar dystir á rað. Og minnist til, at skal liðið bjarga sær, so skulu hini liðini frammanfyri ongan dyst vinna, so at siga.

Kappingin í botninum harðnaði, nú TB vann á KÍ. Tað hevur við sær, at munurin millum nummar níggju, átta og sjey bara er trý stig, og tað vil í stuttum siga, at bæði TB, sum í løtuni er nummar níggju, KÍ, sum er nummar átta, og AB, sum er nummar sjey, kunnu flyta niður.

So er tað, at vit skulu venda aftur til hagtølini. Í summar skrivaðu vit, at tey liðini, sum lógu niðast eftir 15 umfør, í flestu førum enda við at flyta niður. Og sjálvt um AB hevur klárað seg væl í langa tíð, so er ikki óhugsandi, at liðið kann flyta niður kortini. Trý stig er ikki so nógv, men tað er hóast alt frægari í hesi støðu at hava trý stig fleiri enn færri.

Og so er tað jú spurningurin við KÍ, sum hevur klárað seg so ógemeina illa síðan apríl. Eingin torir í roynd og veru at siga, hvar KÍ endar. og tað kann jú gerast talan um bjarging, ella um reindyrkaða fiasko við einari niðurflyting.

Í oddanum er spenningurin eisini stórur. Tað eru bara HB og ÍF, sum kunnu gerast meistarar, og við tað, at ÍF vann móti AB og HB spældi javnt, minkaði munurin millum liðini.

Nú hevur HB 45 stig og ÍF 40, og tí kann nógv henda enn.

Nú er steðgur í landskappingini , tí tveir landsdystir skulu spælast, og so verður kappingin tikin uppaftur tann 15. september. Tá vera dystirnir hesir: