Nú stendur á hjá TB

EFFODEILDIN - 17. UMFAR

Oddastríðið stendur framvegis millum HB og ÍF, og í grundini var tað einasta um hendi í hesum umfarinum, at hesi bæði liðini fingu eitt sindur meira luft enn tey høvdu frammanundan.

Tí syrgdi AB fyri, tá argjamenn á heimavølli vunnu 3-1 á EB/Streymi í tí fyrsta av trimum ólavsøkudystum.

Sigurin hevði við sær, at EB/Streymur, nú tað eru 30 stig eftir at spæla um, er 15 stig aftanfyri HB, og átta aftanfyri ÍF. Enn ber sjálvandi til at gera nakað við tað hjá EB/Streymi, men tað gerst alsamt klárari, at oddastríðið fer at standa millum HB og ÍF.

Er spenningurin avhasaður í oddanum, so er hann als ikki tað í botninum. Har er nú av álvara komin spenningur í.

Eisini tí hevur AB syrgt fyri.

AB lá aftast fyrstu 16 umførini, onkuntíð rættiliga langt aftast. Men seinastu seks umførini hevur liðið ikki tapt. Argjamenn hava vunnið fimm av seks teimum seinastu dystunum og spælt ein javnleik. Tí hevur liðið nú knappliga lyft seg av aftasta plássi, og er enntá farið av næstaftasta plássi eisini. Sigurin á EB/Streymi leygardagin hevur við sær, at AB nú er nummar átta. At siga at liðið er bjargað er tó enn alt, alt ov tíðliga, men ein sannroynd er tað tó, at AB nú er frammanfyri TB.

TB tapti nevniliga týdningarmikla dystin móti Víkingi, sum tí hevur vent gongdini. Felagsliðið úr Eystur kommunu hevur havt eitt strævið ár, tí roknað var við, at Víkingur skuldi liggja í hinum endanum av stigatalvuni. Men tað hevur ikki riggað, og tað kostaði herfyri venjaranum starvið, tá Sigfríður Clementsen avloysti Jógvan Martin Olsen. Tað gjørdi tað eisini hjá TB, sum fyri kortum skifti Hans Fróða Hansen út við Bill McLeod Jacobsen, og tí vóru tað tveir nýggir venjarar, sum skuldu royna at fáa stig henda dagin í Gøtu. Tí kom Víkingur best frá,  tí teir vunnu 3-1, og fóru tí framum TB og sendu tvøramenn niður um strikuna.

Eisini hjá KÍ hevur gingið illa. Venjarin varð skiftur út herfyri, tá Eyðun Klakstein loysti Páll Gudlaugssonn av, men nýggi venjarin hevur ikki havt eydnuna við sær enn. Og tað hevði hann heldur ikki um vikuskiftið, tá 07 Vestur vann við tveimum málum móti einum.

Í Havn vóru tríggir dystir um ólavsøkuna. AB og EB/Streymur spældu á Argjum, og í Gundadali vóru tveir dystir. B36 og ÍF ólavsøkuaftan og HB og NSÍ ólavsøkudag. Tann fyrri endaði við sigri til fuglfirðingar, sum vunnu 2-1 og tann seinni endaði við 3-2 sigri til HB.

Samanlagt hevði tað við sær, at oddin sær út, sum hann gjørdi áðrenn umfari. Bara eitt sindur greiðari. Í botninum er tó broyting í, tí TB er farið niðurum strikuna og er tí undir størri trýsti enn áðrenn. Víkingur, sum áðrenn lá til at enda í niðurflytingarstríðnum, hevur vunnið seg longur fram, og sær tí út til at hava funnið tráðin.

Spurningurin er so, um tað heldur hjá AB og Víkingi, ella um tað vit síggja nú, bara er eitt sprell áðrenn liðini bæði aftur enda í botnstríðnum. Livst so spyrst.

Næsta umfar í Effodeildini verður spælt um vikuskiftið, sær soleiðis út: