Hagtølini siga HB

Bara tvær ferðir, síðan byrjað var at spæla 27 umfør í bestu føroysku fótbóltsdeildini, hevur tað liðið, sum var á odda, tá 15 umfør vóru leikt, ikki vunnið meistaraheitið, tá kappingin endaði um heystið.

Fyrru ferð var í 2006, tá EB/Streymur var tvey stig frammanfyri B36, tá 15 umfør vóru leikt. Tá kappingin var liðug, hevði HB “stjolið” meistaraheitið frá EB/Streymi. Felagsliðið var annars á odda við fimm stigum, tá tað manglaðu tríggir dystir, men tað var ikki nóg mikið tá avtornaði. Tí í seinasta dyst kláraði HB at stjala meistaraheitið frá EB/Streymi.

Aðru ferð var tá NSÍ í 2010 lá á odda eftir 15. umfør. Munurin var bara tað eina stigið, og tað var ov lítið at geva av. Tá kappingin var liðug vóru bæði HB og EB/Streymur farin framum NSÍ, sum tí mátti taka til takkar við bronsuni tað árið.

Øll hini árini hevur tað liðið, sum var á odda tá 15 umfør vóru leikt, vunnið meistaraheitið.

Ongantíð áður hevur eitt lið verið á odda við sjey stigum, tá 15 umfør vóru leikt. Einaferð, tað var í 2009, var HB á odda við seks stigum, og tá kappingin var liðug, hevði HB eisini vunnið meistaraheitið.

Árið fyri, í 2008, var EB/Streymur á odda við fimm stigum, og eisini tað árið vann EB/Streymur sítt fyrsta meistaraheiti.

Tí bendir nógv á, at HB eisini verður føroyameistari, tá hetta kappingarárið er liðugt. Í øllum førum tala hagtølini sítt týðiliga mál.